دوای كۆبونه‌وه‌یه‌ك له‌ گه‌ڵ پارێزگاری سلێمانی به‌ ئاماده‌بوونی جێگری وه‌زیری ئابووری و وزه‌ی بولگاریا، پرۆتۆكوه‌لێكی هاوبه‌ش له‌ نێوان ژووری بازرگانی و پیشه‌سازی هاسكۆڤۆی بولگاری و یه‌كێتی هاورده‌ و ناردنكارانی هه‌رێمی كوردستان واژووكرا.

پێشنیوه‌رۆی ئه‌مرۆ سی شه‌ممه‌ له‌ دیوانی پارێزگای سلێمانی شاندێكی بازرگانی بولگاری به‌ یاوه‌ری سه‌رۆكی سه‌نته‌ری بازرگانی و پیشه‌سازی كوردستانی – بولگاری و سه‌رۆكی یه‌كێتی هاورده‌ و ناردنكارانی هه‌رێمی كوردستان و سه‌رۆكی له‌گه‌ڵ پارێزگاری سلێمانی كۆبونه‌وه‌.

له‌ كۆبونه‌وه‌كه‌دا تیشك خرایه‌ سه‌ر په‌یوه‌ندیه‌ بازرگانیه‌كانی نێوان هه‌رێمی كوردستان و وڵاتی بولگاریا و له‌لایه‌ن خۆیه‌وه‌ پارێزگاری سلێمانی ئاماژه‌ی به‌په‌ره‌ سه‌ندنه‌كانی ئابووری و بازرگانی و وه‌به‌رهێنان كرد له‌ هه‌رێمی كوردستان به‌ گشتی و شاری سلێمانی به‌تایبه‌تی.

هاوكات جێگری وه‌زیری ئابوری و وزه‌ی بولگاریا خۆشحاڵی خۆی ده‌بری كه‌ ئاشنا بوون به‌ هه‌رێمی كوردستان و له‌ نزیكه‌وه‌ ئاگالداری پێشكه‌وتنه‌ بازرگانیه‌كانی ئه‌م هه‌رێمه‌ن.

دواتر به‌ ئاماده‌بوونی به‌هرۆز محه‌مه‌د ساڵح پارێزگاری سلێمانی و كارسین دیمیترۆڤ جێگری وه‌زیری ئابووری و وزه‌ی بولگاریا و ماجد مزوری سه‌رۆكی سه‌نته‌ری بازرگانی و پیشه‌سازی كوردستانی - بولگاری و ژماره‌یه‌ك له‌ بازرگانان و خاغوه‌ن كۆمپانیاكانی ئه‌و وڵاته‌ له‌ دیوانی پارێزگای سلێمانی پرۆتۆكۆلێك كه‌ پێشتر له‌ وڵاتی بولگاریا ئاماده‌كاری بۆكرابوو له‌ نێوان شێخ مسته‌فا شێخ عه‌بدولره‌حمان سه‌رۆكی یه‌كێتی هاورده‌ و ناردنكارانی هه‌رێمی كوردستان و یان چۆنیڤ سه‌رۆكی ژووری بازرگانی و پیشه‌سازی هاسكۆڤۆی بولگاری و واژووكرا.

له‌ لێدوانێكدا شێخ مسته‌فا شێخ عه‌بدولره‌حمان سه‌رۆكی یه‌كێتی هاورده‌ و ناردنكارانی هه‌رێمی كوردستان ئاماژه‌ی به‌وه‌دا كه‌:"ئه‌م پرۆتۆكۆله‌ گشتگیره‌ و ده‌بێته‌ پردێكی په‌یوه‌ندی بازرگانی و ئابووری هه‌رێمی كوردستان و بولگاریا له‌ رووی ئالۆگۆری بازرگانی و به‌شداربوون له‌ چالاكیه‌ ئابووریه‌ هه‌مه‌ جۆره‌كان".

 

راگه‌یاندنی یه‌كێتی هاورده‌ و ناردنكارانی هه‌رێمی كوردستان

07701927180

07501175353